Ég fékk að sofa út í morgun þar sem að Scania verkefnið frestaðist um viku. Maðurinn sem á að vera minn aðstoðarmaður þarna í Scania varð nefnilega veikur og lenti á spítala. Ég tek því þá bara rólega enn eina vikuna, fer á skauta og svona. Ég er alveg orðin sjúk í skauta eftir að ég fann stóra svellið hérna rétt hjá og reyna að nýta alla daga til að fara á skauta áður en ég byrja að vinna hjá Scania. Annars fór pabbi í gær heim til Íslands eftir mánaðar dvöl í útlandinu. Síðasta kvöldmáltíðin var rosalega góð en við keyrðum suður til Södertälje á veitingastað sem sörverar amerískum steikum. Eftir matinn keyrðum við "laugaveginn" í Södertälje og sáum þá að verslunarmiðstöðin þar heitir Kringlan! Við skutluðum síðan pabba upp á völl í yndislegu vetrarveðri, sól, heiðskýrt og kalt. Þar sem að við höfðum bílaleigubílinn það sem eftir var dags ákvað ég að fara út í búð og svona sem endaði náttlega með stórinnkaupum þar sem ég fjárfesti í blender. Við bjuggum til Smoothie um leið og jii hvað það var gott, held að ég hafi gert góð  kaup þarna. Í gærkvöldi fórum við síðan í keilu með vinafólki okkar sem býr hérna rétt hjá okkur og enduðum kvöldið með því að fara öll saman út að borða. Myndir frá síðasta deginu með pabba, skautaferðum og af nýja belendernum eru í myndaalbúminu hérna til hliðar.

Hej hej!

Það var frábært veður um helgina, tilvalið til skautaiðkunar

Í dag fórum við pabbi út um allar trissur á litla bílnum. Dagurinn hófst í Elgiganten þar sem við keyptum kabal fyrir nýja gemsann hans pabba. Næsta stopp átti síðan að vera tæknisafnið en tókum skyndiákvörðum að kíkja uppí Kaknästornet (sem er rétt hjá safninu) eða stærsta sjónvarpsturninn hérna í Stokkhólmi sem hægt er að fara uppí. Þetta er 155m upp, 30 hæðir í lyftu, maður fær nokkuð oft hellu fyrir eyrun í lyftuferðinni sem var nú ekki meira en 20 sek. Það var fallegt vetrarveður í Stokkhólmi og útsýnið var frábært (myndir frá því í myndaalbúminu). Eftir þetta fórum við síðan í tæknisafnið þar sem við skoðuðum gamla síma, útvörp, prentgræjur, bíla, flugvélar, lestar, túrbínur og margt margt fleira. Næst var leið haldið í outlet sem er rétt fyrir utan stokkhólm, þar fundum við nú ekki neitt fýsilegt og enduðum í IKEA sem var við hliðiná og fengum okkur kjötbollur í kvöldmat. Nú er hins vegar kominn tími til að hlamma sér uppí sófa, skella tánum uppí loft og slaka á fyrir framan kassann eftir afdrifaríkan dag.

hälsningar

Kaknästornet sem við fórum uppí

Nú erum við búin að leigja enn einn bílaleigubílinn, þetta er VW Polo í þetta skiptið og nú þegar búinn að nýtast mjög vel. Fórum í dag í stóran verslunarleiðangurinn í Willy's þar sem fjárfest var meðal annars í risastórri ferðatösku sem kostaði bara 250 SEK !!! Einnig var farið í rúmfatalagerinn og íþróttabúð þar sem ég splæsti á mig nýju "underställ" eins og sagt er í svíþjóð eða svona ullarfatnaði. Við ætlum svo að hugsanlega að kíkja í smá bíltúr til Sigtuna á laugardaginn en pabbi fer síðan heim á sunnudeginum. Svo fer bara SCANIA dæmið að byrja !

hej hej!

Nýja underställ-ið mitt

Ég er alveg sjúk í skauta núna, er búin að vera að fara á hverjum degi á skauta alveg síðan ég lét slípa þá í síðustu viku. Hérna í Stokkhólmi eru skautasvell út um allan bæ sem eru ókeypis og slípuð, yfirleitt fótboltavellir sem eru sprautaðir með vatni. Í gær fundum við svell bara rétt hjá okkur, ristastórt skautasvell sem enginn virðist vera að nota því ég hef aldrei hitt neinn annan á svellinu. Þetta er því næstum eins og okkar prívat og persónulega skautasvell, algjört æði!

Tja!

Skautasvellið okkar :) Frímann stendur þarna til hliðar

Við skelltum okkur í skíðaferð í gær (lau) í Kungsberget sem er rétt hjá Gävle í Norður-Svíþjóð í län-inu Gävleborg. Dagurinn byrjaði eldsnemma eða um hálf sjö leytið og tók vetur konungur svo sannarlega vel á móti okkur með -17°C frosti. Við vorum búin að leigja VW Golf og vorum fjögur sem skelltum okkur öll með skíða og brettabúnað. Þegar komið var á staðinn byrjuðum við að klæða okkur í og þá sé ég hvergi brettaskóna mína. Þeir gleymdust í Stokkhólmi þar sem að ég hélt að Frímann hefði tekið þá og hann hélt að ég hefði tekið þá, ég ætlaði því að leigja mér bara skó. Þegar ég kom í skíðaleiguna þá sá ég að heill skíðapakki kostaði nánast það sama og að leigja bara skó þannig að ég ákvað að leigja mér bara skíði og rifja upp gamla takta úr Bláfjöllum en ég hafði ekki farið á skíði síðan ég var 13 ára. Í hópnum var þaulreyndur skíðakappi sem hjálpaði mér að rifja upp taktana sem gekk mjög vel, ég datt allavegana ekki neitt! Mér þótti þetta svo gaman að ég fór alvarlega að pæla í því að fjárfesta í skíðum á næstu vorútsölu. Við vorum ekki lengi að ákveða næstu ferð þarna uppeftir sem verður eftir 2 vikur.

hej då

Kungsberget

Hér er búið að kyngja niður snjó í tvo daga. Frostið er líka búið að aukast, núna komið niður í -8°C og spáð kaldara. Við ætlum að fagna þessum kulda og mikla snjó með skíðaferð á laugardaginn, ætlum að keyra norður í Kungsberget með nokkrum vinum okkar og skemmta okkur á skíðum/brettum í einn dag. Það styttist svo í það að pabbi komi aftur til og þá verður afmælisstemning á Maríustöðum þar sem pabbi "fyller år" eins og þeir segja hérna.

Hej då

Vetur konungur er í Stokkhólmi núna

Það er ýmislegt búið að vera á döfinni hérna síðan síðast. Hið vikulega bandý þar sem reyndar hið leiðindaóhapp gerðist strax á fyrstu mínútunni að ein stelpan tognaði mjög illa. Á laugardagskvöldið var okkur Frímanni boðið í alíslenskt matarboð sem við kusum reyndar að kalla hreinlega þorrablót þar sem boðið var uppá íslenskt hangikjöt, uppstúf, ORA grænar baunir, flatkökur, laufabrauð og að sjálfsögðu var byrjað á að skála í rammíslenskt brennivín. Daginn eftir ákváðum við Frímann að halda áfram með þorrann og elduðum okkur íslenskt slátur með kartöflumús. Í gær skellti ég mér síðan með nokkrum stelpum í Óperuna, við fórum að sjá Rakarann í Sevilla, gamanóperu eftir Rossini, sem var æðislega skemmtileg. Það er alltaf jafn gaman að fara í óperuna og þær eru allmargar sýningarnar hérna í Stokkhólmi sem mig langar að sjá. Á morgun verður svo hittingur hjá íslendingunum eða Onsdag eins og við kjósum að kalla það. Við Frímann erum svo að pæla í að fara í skíðaferð í Kungsberget um helgina en ekkert fast ákveðið ennþá.

Hälsningar